L.lena comprometese a buscar financiación pa volver a entamar les escavaciones en La Carisa
L’alcaldesa de L.lena sabe que en La Carisa entá hai munches ayalgues por afayar y ta dispuesta a poner tolo que faiga falta pa que se vuelvan entamar les escavaciones nos campamentos romanos descubiertos nos montes que marquen la frontera ente’l conceyu l.lenizu y el d’Ayer. «El Conceyu de L.lena tuvo noticies sobre les escavaciones por última vegada en 2018. Sicasí, nel casu de tener una nueva solicitú, dende l’Alministración local vamos collaborar na busca de financiación coles demás entidaes implicaes, como son la Conseyería de Cultura y el Conceyu d’Ayer, que ye’l conceyu nel que s’atopa’l centru d’interpretación de La Carisa», asegura Gema Álvarez.
La reacción de l’alcaldesa de L.lena llega unos díes dempués de que la NUEVA ESPAÑA reflexara nes sos páxines l’informe publicáu apocayá pola arqueóloga Esperanza Martín, una de les espertes con más hores de trabayu en La Carisa. L’estudiu revela l’afayu de más de 200 pieces pertenecientes a los exércitos romanos namás nos campamentos de L.lagüezos y Cuaña y rescampla que na zona entá hai más por afayar. L’autora del informe esplicó amás a lo llargo de la so conversación con esti diariu qu’echa de menos «más implicación» de les alministraciones asturianes pa siguir restolando nos secretos d’un enclave que, amás de ser una mina pa desvelar la hestoria, podría convertise nun atractivu turísticu pa los conceyos d’Ayer y L.lena, y pal restu d’Asturies. «De magar Ramón Argüelles dexó de ser alcalde de L.lena acabó la financiación. Ye una pena porque na parte lleonesa sí se tán moviendo pa poner en valor estos allugamientos», diz Martín.
Les declaraciones de Gema Álvarez ponen de manifiestu que l’interés por siguir desvelando los secretos de la Carisa sigue vivu en L.lena y que los arqueólogos namás tienen que picar a la puerta del Conceyu por que’l so equipu de Gobiernu se ponga al llabor pa buscar el financiamientu que fai falta pa entamar les escavaciones. Anque l’alcalde d’Ayer entá nun manifestó la so postura al respeutive, dalgún de los sos conceyales, fuera de micro, considera que la idea de volver a entamar los estudios «sería bien interesante» pa dambos conceyos y pa toa Asturies.
L’informe d’Esperanza Martín, que lleva por títulu «Militaria nes guerres cántabres. La Carisa, exa d’operaciones», fai rescamplar que los romanos tuvieron que lluchar con uñes y dientes p’adomar a los feroces astur-cántabros. Ente los oxetos atopaos nos campamentos de L.lagüezos y Cuaña tán catalogaos hachos, espades, fleches, pilae (xabalines), proyectiles d’artillería (pila catapultaría) o dardos. D’ente toes eses armes destaca un «pugio», un puñal reforzáu que podía inclusive travesar les cotes de malla enemigues y que ye la xoya del yacimientu.
Ente los afayos rexistraos pol equipu de l’arqueóloga Esperanza Martín hai cuchiellos curvos, rectos, de mangos cuadrangulares, d’espiga redonda y, inclusive, una posible navaya. Nel informe d’Esperanza Martín inclúyese amás una fesoria, cinceles, gabitos, cadenes y hasta una incla portátil de tamañu mui pequeñu que podría tenese usao pa iguar les armes fuera de los campamentos. Pero en La Carisa nun s’atoparon armes namás. Ente otros munchos afayos, hai amás clavíyes que s’utilizaben pa montar les tiendes nes que dormíen los soldaos romanos, vientos de suxeción y piquetes na so posición orixinal.
[–>
«Cola ayuda del Gobiernu del Principáu d’Asturies»
Puedes consultar la fuente de este artículo aquí