Asturies va dexar de ser la única comunidá ensin llei de Biblioteques
La xunta n’Asturies, na pimpana biblioteca del edificiu históricu de la Universidá d’Uviéu, del Conseyu de Cooperación Bibliotecariu, el máximu órganu estatal nesta materia, sirvió esti día a la conseyera de Cultura, Vanessa Gutiérrez, p’anunciar que se salda una anomalía asturiana na política relativa al fomentu de la llectura. Asturies va dexar de ser la única comunidá autónoma ensin llei de biblioteques.
Gutiérrez indicó que s’entamó la tramitación de la futura norma col entamu del periodu de consultes previes. La necesidá de tener un testu que regulara les biblioteques yera un clamor nel sector, y l’Asociación d’Especialistes n’Información y Documentación, Apei, yá reclamó que s’iguara esa falta con un pidimientu que llegó inclusive al Senáu.
Cola nueva llei, esplicó Vanessa Gutiérrez, quier garantizase «l’accesu a los servicios bibliotecarios en tolos conceyos, anovar y reforzar el sistema asturianu de biblioteques y articular una política de fomentu de la llectura y el llibru». Ente les principales midíes destaquen l’articulación del Sistema Bibliotecariu del Principáu y de la Rede de Biblioteques Públiques, la creación del Conseyu Asturianu de Biblioteques y Fomentu de la Llectura, como órganu asesor, y l’entamu de planes estratéxicos como’l direutoriu y el mapa de biblioteques.
La celebración del Conseyu de Cooperación Bibliotecariu traxo a Uviéu a representantes de les comunidaes y ciudaes autónomes p’analizar el presente y futuru d’estos equipamientos. «Ye un honor y una oportunidá pa la nuesa comunidá acoyer esti alcuentru que nos dexa siguir fortaleciendo’l papel d’estos espacios como axentes fundamentales na sociedá urbana y rural» destacó la conseyera. Vanessa Gutiérrez tamién tuvo palabres pal recintu tan singular qu’acoyó la xunta. «La so hestoria», dixo en referencia a la biblioteca de la Universidá d’Uviéu, «atestigua l’espíritu de pervivencia y l’apegu social hacia una institución clave pa la formación d’una ciudadanía llibre y crítica».
La conseyera agradeció «el llabor callao y profesional de bibliotecaries y bibliotecarios, verdaderos axentes de la cultura, que faen un trabayu diariu que resulta esencial pal accesu a la información y a la conocencia». Coles mesmes avanzó qu’en 2026 va celebrase’l III Congresu de Bibliografía Asturiana, que va sirvir pa cavilgar sobre l’impactu d’estos centros y servicios na sociedá.
«Cola ayuda del Gobiernu del Principáu d’Asturies»
Puedes consultar la fuente de este artículo aquí