Percebes que broten de los bloques del puertu en Cuideiru, pero nun son pa los mariscadores
En Cuideiru los percebes pueden brotar de los bloques de formigón del puertu. Esto por aciu d’un proyeutu denomináu «NaturPorts», lideráu pol Puertu de Vigo, cola collaboración de la Universidá d’Uviéu, y tamién de la so homóloga de Vigo y l’Institutu d’Investigaciones Marines (IIM) del CSIC, que busca la integración de la naturaleza nos espacios portuarios. L’oxetivu: llograr un «perfeutu equilibriu ente los aspeutos socioeconómicos y medioambientales de los ecosistemes costeros y marinos».
N’Asturies, el plan piloto entamáu pola Universidá va probar l’usu de les denominaes Soluciones basaes na Naturaleza (SbN) pa favorecer el desenvolvimientu de comunidaes de percebes n’infraestructures portuaries, en concretu, nes de Cuideiru. La encargada de facelo ye la Facultá de Bioloxía, col sofitu d’inxenieros de la Escuela Politécnica de Mieres. Tamién collaboren la Cofradía de Pescadores de Cuideiru y el Serviciu de Puertos ya Infraestructures del Tresporte del Principáu d’Asturies. «Al empar d’estos planes piloto, va realizase un estudiu diagnósticu detalláu de los distintos hábitats esistentes na redolada portuaria pa optimizar les futures acciones de restauración en puertos», espliquen.
La primer actuación en Cuideiru va ser la instalación de plaques esperimentales de percebe tresplantáu. «Va facese un escaniáu 3D pal llogru de nubes de puntos y poder realizar una comparanza al añu cuando se retiren les plaques. Tamién se monitorizará’l folaxe nel dique del puertu de Cuideiru pa cuantificar la incidencia d’esti parámetru sobre’l crecimientu y desenvolvimientu del percebe».
El proyeutu tamién cuenta entamar delles iniciatives de divulgación pa sensibilizar al públicu en xeneral, amás d’a cofradíes de pescadores y mariscadores por que vean los beneficios d’estos entamos nel ámbitu portuariu y la so contribución a la sostenibilidá económica, mediuambiental y social nel sector pesqueru.
Nel casu de Vigo, va afalase la restauración de praderíes marines y va evaluase la degradación según la so esposición a distintes condiciones de folaxe.
[–>
«Cola ayuda del Gobiernu del Principáu d’Asturies»
Puedes consultar la fuente de este artículo aquí