siguir cada pasu de Pelayo a golpe de clic
Imaxínese poder conocer cada pasu que dio’l rei Pelayo allá pel añu 730. Y facelo a golpe de clic, col resultáu na mano en cosa de segundos.
Pos eso va ser posible cola ferramienta que desarrolló la startup asturiana de Pablo Viejo García: Bettermaps, especializada na creación de mapes con intelixencia artificial (IA) dende 2021. L’arquiteutu uvieín va presentar nel Mobile World Congress de Barcelona en marzu una plataforma qu’estrai informaciones históriques de llibros y documentos y mángales nun mapa. Ta probándose cola Asociación d’Amigos del Reinu Astur coles mires de saber ónde tuvieron y qué fixeron tolos reis asturianos: dende Pelayo a Fruela II. Pel momento, tán utilizando la cartografía actual, pero l’oxetivu final ye crear mapes históricos propios.
Les posibilidaes, asegura Viejo, son infinites. «Podemos saber qu’Alfonso II construyó esta capiella nesti añu y si nesi mesmu momentu y nesi mesmu sitiu coincidió con otros personaxes históricos. Puede facese lo que quieras: con escritores, con militares, con científicos… Cola IA puede siguise la vida de Marie Curie«, rescampla. L’uvieín, que trabayó a lo llargo de 9 años en Singapur, esplica que la intención ye tamién comparar fontes. «Va dexanos saber qu’un llibru diz esto sobre Alfonso II y esta otra cosa distinta. Agora mesmo eso ye bien difícil de facer, porque se tien que facer a mano y tárdase muncho tiempu».
Bettermaps tamién tien entamáu otru proyeutu de calter históricu con LA NUEVA ESPAÑA. Consiste na recuperación de documentos del pasáu. «Estrayimos artículos de 600 páxines del periódicu d’ente los años 1975 y 1982 con IA», comenta Viejo. El siguiente pasu va ser que’l proyeytu esguile y que tolos archivos históricos d’Asturies (y de fuera de la comunidá) usen la ferramienta pa estrayer información cuasi nel intre. En Bettermaps utilicen trés intelixencies artificiales al empar. Ye lo que llamen un modelu de «consensu»: «Mandamos la mesma información a les trés y facemos una comparanza a ver si’l resultáu ye’l memu. Si coinciden, ye que ta bien»
Anque ye arquitectu (estudió na Escuela Técnica Superior de la Universidá d’A Coruña), a Pablo Viejo siempre-y interesó’l mundu de la programación. «Dende los 8 años, que tuvi un ordenador», fae. En Singapur trabayó pa EDF (Eletricidá de Francia) como responsable del centru d’investigación en materia de ciudaes sostenibles. Facía simulaciones en 3D pal gobiernu del país asiáticu a 20 o 30 años vista. Dempués de crear otra startup (de nome PTGEM) y xusto primero d’españar el covid, Viejo y la so familia decidieron facer les maletes y tornar a casa, a Asturies. «La mio idea yera volver a marchar. Pero llegó la pandemia y nun me quedó más remediu que quedame. Y dixi: ‘a ver qué puedo facer equí’».
Potencial
Asina foi como nació Bettermaps, con cuatro trabayadores anguaño. Pablo Viejo vio dende’l principiu’l potencial que tenía la IA. «La xente mirábame torcío cuando falaba d’ello, pero llegó ChatGPT y yá tol mundu se dio cuenta. Lo que nun pudi prever ye que diba dir too tan rápido. La tecnoloxía avanzó a galmiaes».
Pablo Viejo pon les gafes del futuru. «Yo creo qu’ún de los impactos mayores que va tener la IA ye na educación. Porque si puede facer tolo que nós tenemos qu’aprender, ¿qué espaciu queda pa los profesores? ¿Qué-yos van a enseñar a los neños? Tenemos que pensar que va camudar el mundu dafechu y lo qu’al curtiu plazu va tener un impactu negativu al llargu plazu va ser perpositivo». Eso sí, insiste en qu’a los seres humanos va face-yos falta marcase «un nuevu propósitu na vida».
Pablo Viejo ta «contentu» del so regresu a Asturies, anque llamenta que n’España ser autónomu ye «complicao». «Nesti país nun ayudamos a los empresarios. Vense como enemigos, en cuenta de como creadores de riqueza», se quexa. De Singapur, una islla probe qu’acabó convirtiéndose nún de los países más ricos del mundu, diz qu’España podría aprender munches coses. La principal: marcase un rumbu claru. «Ellos tienen planes a 5, 10, 20 y 50 años. Tienen una visión mui al llargu plazu y tienen una idea perclara d’aú quieren dir. Equí fáltanos eso. Y cuando tienes una comunidá o una nación que nun sabe aú va, la xente ta menos motivada», conclúi.
«Cola ayuda del Gobiernu del Principáu d’Asturies»
Puedes consultar la fuente de este artículo aquí