El grupu italianu Lutech compra l’asturiana Netinex
Los movimientos empresariales nel sector asturianu de les nueves tecnoloxíes de la información (TIC) nun aparen. El grupu italianu Lutech, qu’ufierta servicios de tresformación dixital ya intelixencia artificial (IA), adquirió la consultora tecnolóxica asturiana Netinex, especializada en soluciones SAP, de software de xestión pa empreses y alministraciones públiques. Ente los veceros de Netinex ta’l Gobiernu del Principáu d’Asturies, el Serviciu de Salú del Principáu d’Asturies (Sespa) o la empresa estatal Hunosa.
Netinex, con sede na plaza de L’Alameda d’Uviéu, yera la filial asturiana de la compañía madrilana Sapimsa y agora dambes dos fueron adquiríes pol grupu italianu Lutech, una compañía tecnolóxica con más de 5.500 trabayadores y unos ingresos añales que superen los 850 millones d’euros. Lutech desembarcó n’España en 2023 con una sede en Madrid (Lutech Spain) y agora refuerza la so presencia cola compra de Sapimsa y Netinex.
«L’adquisición de Sapimsa y Netinex representa pa nós un pasu fundamental pa reforzar la nuesa presencia n’España y poner en valor a dos empreses locales d’excelencia con una fuerte especialización en soluciones SAP y dixitalización. Agora, estes compañíes van poder tener el sofitu d’un grupu internacional capaz d’apurrir servicios entá más completos y especializaos pa l’automatización de procesos, garantizando a los sos veceros un nivel de serviciu escepcional y xenerando nueves oportunidaes de crecimientu», señaló Paolo Mioli, CEO de Lutech Spain y nuevu CEO de Sapimsa y Netinex.
El grupu italianu apurre soluciones informátiques que van dende la consultoría estratéxica hasta la xestión de tecnoloxíes avanzaes como intelixencia artificial o la computación d’altu rendimientu (HPC), pasando por aliances estratéxiques colos actores internacionales en ciberseguridá, esperiencia del veceru y cloud. Anguaño, el grupu tien un equipu de más de 5.500 profesionales al que s’axunta agora’l personal en Madrid y n’Uviéu de Sapimsa y Netinex.
Proyeutos n’Asturies
La compañía asturiana Netinex ta especializada na prestación de servicios de consultoría d’organización del sistema SAP (software de xestión pa empreses y soluciones), anque tamién ufierta encontu técnicu ya informáticu global y formación estándar y a midida. La mayoría de los proyeutos nos que trabaya desenvuélvense dientro d’Asturies y ente los sos principales veceros tán el Gobiernu del Principáu d’Asturies, el Serviciu de Salú del Principáu d’Asturies (Sespa) y l’a mpresa estatal minera Hunosa.
«Cola ayuda del Gobiernu del Principáu d’Asturies»
Puedes consultar la fuente de este artículo aquí