Julia María Martínez-Lombó, coordinadora de la última edición del «Anuariu de la Música n’Asturies (AMES)», destacó la recuperación nesti últimu añu de la música folk asturiana, con 13 trabayos discográficos y 29 singles editaos, y la proyeición de los músicos d’Asturies fuera de les nuestres fronteres. La nueva edición del anuariu ta yá a venta en «La Bomba Records» (Uviéu) y en «Librería Paradiso» (Xixón). A la presentación, va unos díes na Biblioteca d’Asturies, n’Uviéu, asistió’l direutor xeneral d’Acción Cultural, Antón García, que fixo alusión a la conmemoración de los 20 años de los premios AMAS y a les sorpreses que se tán preparando pa la gala d’esti añu.