Hai instantes dignos de ser enmarcaos pa la posteridá. El «Memorial María Luisa», ún de los concursos de fotografía más importantes a nivel mundial, recibió na so trixésimu quinta edición 18.684 fotografíes que cumplen dafechu con afirmación tala. La ganadora d’esti añu, «Black panther under the stars», del indiu Rajarshi Banerji, enseña un momentu únicu d’un animal cola so presa. El mesmu autor esplica la imaxe: «Tuviera concentráu dafechu nel comportamientu d’esta pantera negra a lo llargo de munchos díes y noté que xeneralmente prefería xubir a un árbol bien tupíu dempués de matar a un animal pa poder comer escondida ensin que nada la fadiase. Pero esa nueche otru lleopardu escorrióla depués de cazar a un animal y ella xubió al primer árbol que pudo atopar pa defender la so presa».