La bioincubadora de La Corredoria, que va abrir esti añu, tendrá dos llaboratorios, una sala blanca y otru espaciu pa cultivos celulares
La incubadora d’alta tecnoloxía especializada en ciencies de la vida que se va instalar nel Viveru de Ciencies de la Salú de La Corredoria da pasos firmes pal so entamu esti añu. L’axencia de ciencia Sekuens, dirixida por David González, sacó a llicitación un contratu clave pal desarrollu del proyeutu: un serviciu de consultoría n’analís empresarial, investigación y desarrollu. Con un presupuestu de 319.193,31 euros y un plazu d’execución de dos años, les empreses interesaes van poder presentar les sos ufiertes hasta’l 2 d’abril.
Esti contratu estrema en trés llotes esenciales pal funcionamientu de la incubadora. El primeru, enfocáu nel sofitu al emprendimientu, va ufiertar formación y asesoramientu a los que quieran crear nueves empreses nel sector biosanitariu o afitar les esistentes. El segundu, destináu al fomentu de l’anovación y el «mentoring», va apurrir asistencia téunica pa facilitar l’adopción de nueves tecnoloxíes nes pymes venceyaes a la incubadora. El terceru ta empobináu a la creación del centru d’hibridación, un espaciu pa identificar y desenvolver idees anovadores, construyir prototipos y establecer aliances estratéxiques. Según la documentación ellaborada por Sekuens, esti proyeutu «nun supon en nengún casu la cesión d’autoridá nin l’exerciciu de potestaes inherentes a l’axencia».
La llicitación d’esti contratu produzse mientres avanza otru yá axudicáu: la redaición del proyeutu d’obres p’afayar el Viveru de La Corredoria. La empresa vallisoletana Runitek Inxenieros féxose con esti encargu n’ochobre del añu pasáu y tien un añu pa definir y supervisar les actuaciones que faen falta nel edificiu. Con un costu de 55.660 euros, esti contratu establez cuatro meses pa la planificación de les obres y otros seis pa la so direición una vegada empiecen los trabayos.
El Viveru, construyíu en 2011, tien en total 3.243,98 metros cuadraos distribuyíos en trés plantes, de los cualos 580 van ser destinaos a la bioincubadora na so primer fase. Esti espaciu, que’l Conceyu va ceder al Principáu, llogró una financiación de 1,2 millones d’euros del programa plurirrexonal de fondos FEDER xestionaos pola Fundación Institutu Cameral pa la Creación y Desenvolvimientu de la Empresa (Incyde). Van afayase dos llaboratorios con sala blanca modular, almacenes, una sala de cultivos celulares preparada pa la futura instalación d’autoclaves y ultraconxeladores, una sala d’escaláu a producción d’usu común y la oficina d’hibridación.
L’oxetivu de la incubadora ye afitar el sector biosanitariu n’Asturies cola creación de 15 nueves empreses, el sofitu a otres 35 compañíes y actuaciones de dinamización en 200 sociedaes. Amás, cuéntase cola xeneración de 115 puestos de trabayu: 50 direutos y 65 indireutos. Esta primer fase del proyeutu espúrrese hasta 2027. D’ehí p’alantre, va evaluase si l’actividá sigue nel Viveru de La Corredoria o si fae falta un treslláu a un espaciu más ampliu. Una de les opciones que más fuerza garró ye la d’instalar la incubadora na antigua fábrica d’armes de La Vega, onde cuenta desarrollase un polu d’anovación biosanitaria. Sicasí, dende’l Principáu insisten en qu’entá ye llueu pa definir esta reubicación, una y bones el futuru usu de les naves sigue en fase de planiamientu.
Axencia de Salú Pública
Otra de les iniciatives que s’embaraxen pa La Vega ye la instalación de la futura Axencia Estatal de Salú Pública (AESP). Va un añu, l’alcalde, Alfredo Canteli, ufiertó al presidente del Principáu, Adrián Barbón, el castiellu d’entrada del recintu como posible sede, pero’l Gobiernu central, lideráu pol tamién socialista Pedro Sánchez, nun dio pasos concretos pa la so creación nin confirmó si Uviéu va ser la ciudá escoyida.
Mentanto, la bioincubadora de La Corredoria avanza col sofitu de los fondos europeos y les alministraciones local y autonómica. Col nuevu contratu en llicitación y les obres entamaes, el proyeutu entra nuna fase clave pa definir el so impactu nel ecosistema empresarial asturianu y afitar el so papel como referente en biotecnoloxía aplicada a la salú.
«Cola ayuda del Gobiernu del Principáu d’Asturies»
Puedes consultar la fuente de este artículo aquí