Asturies refuerza la cooperación al desarrollu en favor de les muyeres
Les trabayadores doméstiques na República Dominicana, les llabradores ya indíxenes de Chile, les muyeres implicaes en proyeutos d’emprendimientu social en Bolivia, moces y neñes de Kenia, El Salvador, Guatemala y Honduras fueron en 2024 les beneficiaries de siete programes internacionales afalaos y financiaos pola Axencia Asturiana de Cooperación al Desenvolvimientu.
Esti añu l’Axencia asturiana va destinar 700.000 euros pa subvencionar proyeutos empobinaos al «empoderamientu, promoción y defensa de los derechos de les muyeres». El presupuestu incrementóse en 200.000 euros al respeutive del exerciciu anterior, un 40% más y l’importe máximu de l’ayuda por proyeutu pasa de 70.000 a 100.000 euros.
La nueva convocatoria, publicada va unos díes nel Boletín Oficial del Principáu (BOPA), apunta a les causes estructurales de la desigualdá de xéneru, con proyeutos d’empoderamientu políticu y social de les muyeres y de defensa de los derechos de les muyeres y contra la violencia de xéneru énte situaciones d’especial vulnerabilidá.
L’Axencia de Cooperación asturiana subvencionó en 2024 siete proyeutos empobinaos a la promoción de les muyeres. Trés d’ellos taben empobinaos a favorecer l’empoderamientu políticu y social de les trabayadores doméstiques na República Dominicana, de les muyeres llabradores ya indíxenes de Chile y a impulsar oportunidaes llaborales d’emprendimientu social en Bolivia. Otros cuatro busquen promover los derechos sexuales y reproductivos y prevenir la violencia de xéneru entre muyeres y adolescentes de comunidaes de Kenia, El Salvador, Guatemala y Honduras.
Dende l’entamu d’esta convocatoria, nel añu 2018, l’Executivu asturianu sofitó económicamente 38 proyeutos. 72.996 persones beneficiáronse direutamente d’ellos, de les que 48.667 son muyeres, en 11 países d’América Llatina y África.
Diez desarrollárense n’El Salvador, el país que concentró más recursos, siguíu de Chile, con cinco, y Nicaragua, Honduras y Senegal, con cuatro caún d’ellos.
«Cola ayuda del Gobiernu del Principáu d’Asturies»
Puedes consultar la fuente de este artículo aquí