Arde la panera más antigua (del añu 1651) de Cangas del Narcea: «Abulta que foi intencionáu»
Cangas del Narcea perdió va unos díes la so panera más antigua, datada en 1651. Una quema que se declaró la mañana del sábadu 1 de marzu afaró dafechu la construcción asitiada en Riegla de Cibea y propiedá del Obispáu, al pertenecer a la casa rectoral del pueblu. El cura de la parroquia, el dominicu Francisco Javier García, más conocíu como Pachi, punxo una denuncia nel cuartel de la Guardia Civil pa que s’investigue’l sucesu.
“Ta nun llugar aislláu y ellí nun hai lluz pa que pudiera dase un cortucircuitu, naide esplica qué pasó, abulta que foi intencionáu”, apunta’l párrocu, qu’asegura que los bomberos qu’aportaron p’apagar el fueu nun fueron quien a esplicá-y cuálu pudo ser l’orixe y amesta que se da la circunstancia de que xusto’l sábadu la persona que xestiona la finca nun taba en pueblu.
Panera de la casa rectoral de Riegla de Cibea. / Tous pa tous
A media mañana, los vecinos de dellos llugares de la parroquia empezaron a columbrar fumu na zona, que llueu se convirtió en grandes fogaraes. La sala del 112 recibió l’avisu a les 11.52 hores y hasta’l pueblu aportaron el Xefe de zona y cinco bomberos del parque de Tubongu.
“Ye bona llástima porque yera una panera de muncha calidá, amás de ser la más antigua”, fae’l sacerdote. Un llamentu que comparten los vecinos de la parroquia que sienten la perda d’esti elementu etnográficu. “Anque pertenecía al Obispáu yera de toos y la xente d’equí siéntelo muncho, agora namás nos queden les semeyes”, llamenta José Antonio Rodríguez, de Sonande.
El presidente de l’asociación “Tous pa tous”, Juaco López, dedicara un artículu a esti elementu en 2010, nel que sorrayaba que se trataba de la panera más antigua que se conoz nel conceyu, onde “la mayoría daten de finales del sieglu XVIII y, sobremanera, de los sieglos XIX y XX”, dicía. Amás, amestaba que yera probable que la construcción llegara a Riegla de Cibea d’otru llugar por que nes sos tables podíen vese les marques de ser desmontada.
«Cola ayuda del Gobiernu del Principáu d’Asturies»
Puedes consultar la fuente de este artículo aquí