Asturies, segunda comunidá onde más se redució’l censu d’empreses en 2022
Asturies ye la segunda comunidá con mayor decrecimientu en 2022 del censu empresarial, superada namás por La Rioxa. La causa principal d’esti saldu negativu ente creación y zarru d’empreses nun ta tanto na tasa de fracasu de les sociedaes como na baxa natalidá, lo que ta venceyao a los índices d’escasu emprendimientu, seya por causes culturales y baxu espíritu empresarial, condiciones del entornu o débil emulación de comportamientos sociales que lo afalen.
Con datos definitivos al cierre de 2022, sopelexaos esti día pol Institutu Nacional d’Estadística (INE), Asturies enseña un retrocesu del 1,2% ente nacencia y muerte de sociedaes mercantiles frente a una tasa llixeramente positiva (0,05%) del promediu español. En situación peor qu’Asturies namás s’atopa La Rioxa (-1,8%).
La tasa de mortalidá societaria sobre la cifra total d’empreses (8,1% nel casu d’Asturies) ye inferior al promediu español (8,6%) y asitia al Principáu nuna posición discreta: la octava ente 17 comunidaes autónomes. Sicasí, la creación d’empreses ye baxa n’Asturies, qu’ocupa’l decimocuartu llugar por xeneración de sociedaes y una tasa (6,8%), que ye 1,8 puntos inferior al promediu. Asturies solo superó en tasa de creación de nueves sociedaes a Navarra (6,6%), Castiella y Lleón (6,4%) y la Rioxa (5,8%).
D’esta miente, mientres Asturies axuntaba’l 2% de les sociedaes mercantiles del país nel exerciciu, les fracasaes fueren el 1,8% del total (dos décimes menos), pero les de nueva constitución apenes fueren poco más del 1,58% de les creaes n’España. Con 69.811 empreses n’Asturies, esi añu creáronse na comunidá 4.772 y sumieron 5.632. De les 17 comunidaes, el saldu foi negativu en 10 autonomíes, mesmo que lo foi nes dos ciudaes autónomes.
Anque’l factor determinante del baxu puxu del texíu societariu asturianu ye la insuficiente natalidá d’empreses y non tanto la so supervivencia, ye significativa la manifiesta relación direuta ente l’escasu tamañu de los negocios n’Asturies y la so capacidá de sobrevivir. Les empreses con 10 o más trabayadores namás suponen el 4,08% del censu empresarial asturianu, pero apenes apurrieron el 0,28% de les disoluciones. Les empreses con plantiya ente 0 y 9 empleos axunten el 95,92% del censu pero algamen el 99,72% de les lliquidaciones.
[–>
«Cola ayuda del Gobiernu del Principáu d’Asturies»
Puedes consultar la fuente de este artículo aquí