Alumnos y profesores de la Escuela d’Arte d’Uviéu, dende 1.^u de bachilleratu hasta los segundos cursos de los ciclos formativos y de delles especialidaes, dieron forma a lo llargo de dos selmanes a una intervención, a manera d’esposición, nel antepar del centru dedicada a Marjane Satrapi. La ilustradora francoiraní contaba visitala nel so viaxe a Uviéu pa recoyer el premiu «Princesa d’Asturies» de Comunicación y Humanidaes pero al cabu tuvo qu’entainar y acurtiar la so estancia por problemes familiares y nun pudo cumplir col so programa n’Asturies. Con too y con ello, el trabayu col que los estudiantes d’Arte afondaron na obra de Satrapi va permanecer nel centru, abiertu a les visites, hasta’l 15 de payares. L’artista, cunten, pudo conocelu y compartiólu al traviés de les redes sociales.