La collecha asturiana del añu lliterariu en 31 títulos
Magar que nun se trata de «lo meyor», sinón «lo provechoso, lo interesante», encabecen esta seleición pa LA NUEVA ESPAÑA de llibros d’autores asturianos d’esti añu los títulos más recurrentes nos encamientos recibíos. El más citáu foi un poemariu, «Argayu / derrumbe», regresu a la poesía pa una autora mayor na lliteratura asturiana, Berta Piñán, depués d’un llargu paréntesis. Editáu en Bartleby, salió n’edición billingüe. L’ensayu de la música y artista visual Leticia Baselgas, «Diarios d’una panderetera», sirvió a la editorial La Fabriquina pa inaugurar la so colección d’ensayu, «Manifiestu», y ta disponible n’asturianu y castellanu. El terceru más citáu foi tamién una referencia nos llistaos nacionales, ye la novela «Matamonstruos» (Impedimenta) cola que Jon Bilbao (Ribeseya, 1972), cierra’l ciclu qu’entamó con «Basilisco». Nuna collecha na que la ficción narrativa nun prima per delantre d’otres, recibieron mención noveles como «La sacavera», de Jorge Ordaz, el regresu de Sara Torres con «La seducción», «Lo que acecha» (premiu Orpheus) de Carmen Ruiz Gómez, «La niña del sombrero azul» de Ana Lena Rivera o «Cocos de luz», de Rosa Valle. N’asturianu inclúinse nesti apartáu «Miel amargo», de Xulio Vixil, y «Coses rares» de Solinca Turbón, únicu llibru de relatos ente les 31 referencies destacaes.
La llista de pomearios toma munchos ámbitos. Hai autores yá clásicos, como Javier Almuzara, qu’acaba de publicar en Renacimiento «Esperanza de vida» o Javier Lasheras, ganador del premiu Jaén con «Una noche o la mecánica corrosiva de los cuerpos celestes». Tamién ta’l postreru «Premiu Xose María Acebal», «Les hores de lluz», de Xosé Anxelu Gutiérrez. Siguen, n’asturianu, «Fondures» de David Fueyo, «Buraca», de José Luis Rendueles, o l’antoloxía de poesía contemporánea global realizada por Miguel Rodríguez Monteavaro y Pablo Texón («Nesa isla hai pantasmes»). Completen l’apartáu poéticu la «Cancelación del ruido» de Yasmina Álvarez, «Es medianoche en casi todo el cuerpo» de Gema Fernández y «Ni el número ni el orden», de Fernando Menéndez. Esti autor figura por partida doble, yá que les sos reflexones de los tiempos del covid, «El estupor», tamién fueron citaes. Nel terrén de la non ficción y l’ensayu ta l’últimu de Xuan Xosé Sánchez Vicente, «De los sueños hicimos pesadillas», l’analís sobre Marruecos de Laura Casielles en Libros del KO, «Arena en los ojos», «Marca de resistencia», d’Alejandro Basteiro, «Asturianos de ciudad», de Beatriz Rato, «Empeñados en ser felices» de Miguel Munárriz, el cuadernu de viaxe de Cordelia Pickford o «Los cuadernos de la retaguardia», de Ramón Lluis Bande. De la mano de KRK lleguen dos llibros bien singulares que podríen catalogase nesti xéneru, «Doble autorretrato mundo», de Moisés Mori, y el diálogu ente Ricardo Menéndez Salmón y Cristian Crusat sobre Sebald, «Prosa del mundo, poesía de lo pertinente». Dos reediciones actualizaes completen la nómina, «La mujer, antes, en la guerra y después» de la pionera autora llanisca María Luisa Castellanos y el clásicu «Asturias, octubre 1934» de Paco Ignacio Taibo II.
Estes seleición iguóse coles recomentaciones del presidente del gremiu de llibreros Rafa Gutiérrez (La buena letra, Xixón), Jorge Salvador (ún de los socios de Matadero Uno, n’Uviéu), l’escritor y coordinador de POEX Jaime Priede, la responsable de biblioteques n’Uviéu, Chelo Veiga, el llibreru Rafa Quirós (Librería Cervantes), la escritora y crítica Marta Mori, Diego Garot, autor y sociu de Kafca&CO, y María Jesús Polledo, qu’esti añu cerró’l so negociu na uvieína cai El Pesu.
[–>[–>
«Cola ayuda del Gobiernu del Principáu d’Asturies»
Puedes consultar la fuente de este artículo aquí