La xeotermia avanza en Mieres y va llegar a otros 21 edificios públicos
Les obres de la segunda fase de la rede de xeotermia de Mieres tán a puntu d’entamar. El Conceyu axudicó los trabayos de «Allongamientu de la rede de calefacción por distritu pa les cais Valeriano Miranda y Numa Guilhou» a la empresa Elecnor Servicios y Proyectos. L’importe máximu de la obra yera de 3,6 millones y foi axudicada en 3.462.975 euros, impuestos incluyíos. Trés compañíes allegaron a esti concursu públicu, siendo la ganadora la ufierta de preciu entemediu, pero ufiertando una garantía de 5 años.
Estes obres d’ampliación de la xeotermia yá salieren a concursu a principios de 2023. Nun hubo empreses interesaes. Ello ye que’l Conceyu de Mieres tuvo que pidir una ampliación tanto del plazu d’execución como de la cantidá invertida nel proyeutu, que s’alzó dende los 2,4 a los 3,6 millones, financiaos pol Institutu pa la Transición Xusta con fondos Next Generation nel marcu del Plan de Recuperación, Tresformamientu y Resiliencia (PRTR). Esta nueva rede de calor que va partir de la zona d’El Batán va llevar la climatización a una ventena d’edificios de les cais Numa Guilhou y Valeriano Miranda. En total, el plan cuenta llegar a los 31 edificios, magar la presente actuación céntase en 21 d’ellos. Son les sedes del Conceyu de Mieres, los xulgaos, la Policía Local, la Delegación de Facienda, los centros de salú Mieres Norte y Mieres Sur, el xalé de Numa Ghuilou, l’edificiu de Servicios Sociales, el campu Hermanos Antuña, l’estadiu Mundial 82, el pabellón Visiola Rollán, los colexos Lastra, Licéu, Aniceto Sela, Santiago Apóstol, Santu Domingo y Teodoro Cuesta, amás de los IES Batán y Sánchez Lastra, la escuela infantil Les Xanes, el Centru Social de Persones Mayores y la Casa de la Música. Tamién hai otros once edificios que son susceptibles de conectase a la rede: la Policía Nacional, la estación d’autobuses, los polideportivos d’Oñón y Mieres Sur, el colexu Llerón-Clarín, la Escuela d’Adultos, l’archivu municipal, y cinco bloques de viviendes en La Mayacina.
La primer fase de la rede de xeotermia de Mieres empezó a funcionar en 2015, y ente otros edificios abastez al campus de Mieres, los pisos de Vipasa en La Mayacina y al hospital Álvarez-Buylla. Esti postreru ye’l so principal «consumidor»: el 77% dl agua caliente que sal del pozu Barredo con esta rede destínase al gran centru sanitariu comarcal.
La xeotermia ye una fonte d’enerxía anovable qu’aprovecha’l calor del interior de la tierra por aciu del agua cola que s’inunden les mines. En Llangréu esiste yá otra rede de calor en funcionamientu.
[–>
«Cola ayuda del Gobiernu del Principáu d’Asturies»
Puedes consultar la fuente de este artículo aquí