El retrasu de la maternidá agudízase y cuatro asturianes fueron madres con más de 50 años en 2024
L’enclín a retrasar la maternidá agudízase de manera progresiva. Asina lo rescamplen los datos rexistraos l’añu pasáu nel Hospital Universitariu Central d’Asturies (HUCA), onde dieron a lluz hasta 254 muyeres de 40 años p’arriba. D’elles, 28 teníen 45 años o más. Y d’estes postreres, 4 yeren mayores de 50 años. Nel estremu opuestu, 10 de les muyeres asistíes yeren menores de 18 años.
«La edá media de les xestantes aumentó nes últimes décades», destaquen fontes del área d’Obstetricia del complexu sanitariu uvieín. Dende l’añu 2015, les muyeres mayores de 40 años que dieron a lluz nel HUCA pasaron de ser el 10 por cientu del total a contase cerca del 14 por cientu na actualidá.
L’indicador más esperanzador de 2024 ye la cifra total de nacencies. Nel hospital uvieín nacieron un total de 1.887 neños, esto ye, 134 más que nel añu precedente, lo que representa un aumentu del 7,6 por cientu.
Pese a la citada medría, esi datu de 1.887 nacíos ye’l más baxu en bien d’años, cola esceición del rexistráu en 2023, que significara un descensu ensin precedentes. Tou ello nel contestu d’un enclín a la baxa que yá empezó en 2010, coincidiendo cola crisis financiera mundial d’aquel momentu.
[–>De los 1.843 partos contabilizaos l’añu pasáu, 42 fueron múltiples. «L’aumentu de ximielgos nel HUCA ye por mor fundamentalmente d’una mayor derivación d’otres árees sanitaries, coles mires d’una mayor seguridá maternu-fetal», indiquen los especialistes del centru sanitariu. La tasa de prematuridá foi del 9 por cientu, llixeramente perriba de la rexistrada en 2023. Esti fenómenu de la prematuridá ye consecuencia, en bona parte, de los factores de riesgu que presenten les madres, ente elles diabetes, lupus, hipertensión o edá materna avanzada. L’HUCA creó unidaes multidisciplinares pa la diabetes y el lupus.
La edá de la muyer condiciona los embaranzos y los partos. Una de les derivaes ye que más del 40 por cientu de los partos nun fueron naturales, sinón que fueron inducíos pa evitar problemes mayores. La medría d’esti epígrafe ye constante nos últimos siete años. Les cifres del complexu sanitariu tán influyíes pola llegada de situaciones complicaes d’otros hospitales.
Magar les dificultaes qu’imponen los enclinos citaos, el balance de 2024 del área d’Obstetricia del HUCA inclúi indicadores calidables positivos, porque amuesen «una menor intervención na muyer». Per una parte, cuasi’l 70 por cientu de los partos fueron eutócicos, esto ye, non operatorios, ensin cesárea nin fórceps nin ventosa nin espátula. La tasa de cesárees asitió «dientro de los criterios encamentaos pola OMS». Coles mesmes, «namás al 9 por cientu de les muyeres-yos fixo falta episiotomía» (incisión nel texíu ente l’abertura vaxinal y l’anu a lo llargo del partu, pa facilitalu).
Tamién son datos favorables l’incrementu progresivu del contautu piel con piel de madre y fíu, que llegó al 72 por cientu; el pinzamientu tardíu del gordón umbilical, superior al 70 por cientu; y la implantación de la lactancia materna esclusiva al alta, asitiada nel 73 por cientu.
[–>
«Cola ayuda del Gobiernu del Principáu d’Asturies»
Puedes consultar la fuente de este artículo aquí