los detalles de la nueva edición
El venceyu ente poesía y cine va ser la temática na que va pescudar la sesta edición del Poex. Sol títulu «Poesía & cine: lleer los colores de la realidá», el festival va axuntar a unos 50 autores, que van participar nunos 40 actos que se van celebrar del xueves 13 al sábadu 22 de marzu. Esti eventu, yá afitáu na programación cultural de la ciudá, tendrá otra vuelta l’Antiguu Institutu como la so sede central y principal, pero va espardíse tamién pela Escuela de Comerciu, el Toma 3 y la rede de biblioteques municipales, que van allugar tamién actividaes abiertes al públicu.
Otra de les novedaes va ser la recuperación de la collaboración cola Sociedá Filarmónica de Xixón, con un conciertu que se celebrará nel teatru Xovellanos el miércoles 19 de marzu, a cargu del tenor José Manuel Montero. Tamién se van estrechar llazos col FICX y la ESAD. Nel casu del Festival de Cine va ser especial, por cuenta de la temática d’esta edición del Poex, y pa entamar delles proyeiciones, qu’agora mesmo nun tán entá zarraes, por cuenta de que se ta trabayando cola xestión de los derechos.
Tocantes a la ESAD establezse un venceyu pa un concursu de videopoemes, que se va abrir yá, y con un xuráu que va salir de la escuela, coordináu por Nacho Ortega, el so direutor. Nun será la única presencia participativa d’estudiantes, por qu’otra vuelta dende la direición del Poex va mirase d’averar la poesía a los mozos, con actividaes empobinaes a escolinos de Primaria y Secundaria de los centros de la ciudá, una apuesta que va ganando pesu dientro d’ún de los retos marcaos polos organizadores de consiguir facer llegar la poesía a nuevos llectores.
Na anterior edición foi protagonista la música. Agora decidióse que seya’l cine, dientro de la filosofía de pescudar nes relaciones ente los distintos llinguaxes poéticos, y facelo ente la imaxe y la palabra. La intención, dende l’equipu del Poex, ye averar al públicu a esi nexu ente «poesía y una triba concreta de cine, como necesidá de percibir el tiempu d’una forma más acelerada». Y que seya una visión del cine averáu a la poesía más allá d’un simple interés na trama, porque dambos «son un arte del tiempu, como forma más íntima de percibir el roce de la temporalidá, y lleer d’otru xeitu los colores de la realidá».
Tocantes a los participantes, nestos momentos entá tán cerrando tol programa, pero con esa intención de que pueda llegase a una cifra de 50 autores, ente tolos actos que se van allargar diez díes.
«Cola ayuda del Gobiernu del Principáu d’Asturies»
Puedes consultar la fuente de este artículo aquí