fuerte aumentu d’hipoteques, pero de menor cuantía
Asturies rexistró l’añu pasáu la firma de 8.027 creitos hipotecarios pa la compra de vivienda, lo que supon un aumentu del 17% al respeutive de 2023, el cuartu mayor incrementu ente les comunidaes autónomes, según los datos publicaos va unos díes pol Institutu Nacional d’Estadística (INE).
Amás, el capital emprestáu pa la constitución de les hipoteques creció l’añu pasáu un 13,9%, hasta 876 millones d’euros. Sicasí, la cuantía media de la hipoteca menguó, al pasar de 112.044 euros en 2023 a 109.116 euros en 2024 y ello a pesar de que los pisos encareciéronse n’Asturies según los mesmos datos del INE y los de los principales portales inmobiliarios. Esto indica que los compradores disponíen de más recursos p’apechar cola compra nun contestu de crecimientu económicu.
Namás n’avientu, la firma d’hipoteques na comunidá xubió a un ritmu interañal del 33,1% –once puntos menos qu’en payares– con 715 préstamos. La firma d’hipoteques encadenó n’Asturies siete meses d’incrementos interañales, depués de les meyores del 6,8% en xunu, del 35,8% en xunetu, del 15% n’agostu, del 32,5% en septiembre, del 140,1% n’ochobre y del 44,1% en payares coincidiendo cola baxada de los tipos d’interés y, con ello, l’abaratamientu de los creitos.
La medría de 2024 produzse dempués de que la firma d’hipoteques pa vivienda cayera l’añu anterior n’Asturies un 15,9%, hasta 6.862 préstamos, lo que remató una racha de nueve exercicios al alza. Pese al incrementu del añu pasáu, la cifra d’hipoteques firmaes n’Asturies pa la compra de vivienda nun superó a la rexistrada en 2022, que foi de 8.156, la mayor dende 2010.
Xubida nacional
Nel conxuntu del país, el númberu d’hipoteques constituyíes p’adquirir una vivienda aumentó’l pasáu añu un 11,2%, hasta 423.761, anque tamién quedó per debaxo de la cifra de 2022, y el so importe mediu aumentó un 2,7%, hasta los 145.673 euros. Según los datos del INE, el capital emprestáu aumentó un 14,2% y algamó los 61.730,5 millones. El plazu mediu foi de 25 años y, del total de les hipoteques constituyíes n’avientu, un 36,6 % fixéronse a tipu variable y un 63,4 % a tipu fixu. El tipu d’interés mediu al entamu foi del 3,16 % pa hipoteques a tipu variable y del 3,30% pa les de tipu fixu.
«Cola ayuda del Gobiernu del Principáu d’Asturies»
Suscríbete para continuar leyendo
Puedes consultar la fuente de este artículo aquí