Ence, con fábrica en Navia, gana 31,6 millones gracies al alza del preciu de la celulosa
El grupu papeleru Ence, con una fábrica en Navia, llogró un beneficiu netu de 31,6 millones d’euros en 2024 –frente a les perdes de 24,7 millones rexistraes l’añu anterior–, impulsáu pola meyora del preciu de la celulosa y l’amenorgamientu de costos nel conxuntu del pasáu exerciciu, según informó va unos díes
Estes cifres llógrense a pesar de que nel cuartu trimestre de 2024 producióse una correición nel preciu d’esta materia prima, esencial pa la so actividá industrial, y un repique temporal del costu de caxa. L’importe netu de la cifra de negocios del grupu papeleru y enerxéticu asitió l’añu pasáu nos 876,2 millones d’euros, lo que representa un crecimientu del 5,6% al respeutive de 2023.
Amás, nel exerciciu de 2024, Ence distribuyó dividendos a cuenta por un importe conxuntu de 34 millones, lo que supunxo una rentabilidá del 5% pal accionista.
La empresa tamién anunció qu’esti añu va empezar a producir na planta naviega un nuevu tipu de celulosa, denominada «fluff», pal so usu na fabricación d’hasta 125.000 tonelaes de productos hixénicos absorbentes –como pañales o compreses– n’Europa.
Pa fabricar la celulosa «fluff» –la primera ellaborada a partir de madera d’ocalitu n’Europa–, la compañía realizó una inversión d’unos 30 millones d’euros na factoría asturiana. Según anunció nel so momentu Ence, la comercialización d’esta nueva gama de productos va empezar nel últimu trimestre d’esti añu y va permitir aumentar la competitividá de la fábrica cola so entrada en nuevos mercaos, mesmo qu’amenorgar la dependencia europea d’EE UU d’esta gama de productos. La nueva celulosa va destinase principalmente al mercáu européu.
Otres apuestes
Amás, Ence tamién va empezar a producir celulosa moldiada pa sustituyir a los envases de plásticu n’alimentación.
Nel ámbitu d’enerxía térmica anovable, onde Ence tien dos contratos activos, contémplase la creación d’una plataforma de producción de combustibles anovables con CO2 bioxénicu nos sos complexos industriales de Mérida, Huelva y Puertollano.
Amás, la compañía anunció a finales del añu pasáu la compra d’una planta de biometanu en Tarragona col enfotu de reconvertir el so negociu hacia los biofertilizantes.
«Cola ayuda del Gobiernu del Principáu d’Asturies»
Puedes consultar la fuente de este artículo aquí