Asina se fabricaron, de cenices de biomasa, dieciocho millones de botelles y esti foi’l papel clave que xugó Asturies
El vinu naz de les uves, esto ye, de la tierra. Eso sábelo’l ser humanu dende’l Neolíticu, dómina de la que daten los primeros nicios arqueolóxicos de la so ellaboración, nos montes Zagros, la cadena de cumes qu’anguaño s’estiende a lo llargo d’Iraq ya Irán. Los materiales del vidriu col que s’embotella la popular bebida tamién vienen de la naturaleza. Y los crecientes enclinos d’economía circular –na que les empreses reutilicen los materiales usaos nun procesu industrial– dexen que les botelles seyan entá más naturales. Exemplu d’esto postrero ye un proyeutu piloto de recién fechu a comuña por Acciona y la empresa vasca d’envases de vidriu Vidrala, y nel qu’Asturies xugó un papel esencial. El resultáu: 18,3 millones de botelles.
La iniciativa utilizó 230 tonelaes d’escories (cenices) de biomasa –materia orgánica vexetal o animal utilizada como fonte enerxética– llograes nel procesu de combustión de la planta de xeneración d’eletricidá anovable d’Acciona en Briviesca (Burgos). La biomasa contien un altu porcentaxe de xil, un compuestu mineral clave na fabricación de vidriu.
De siguío, les 230 tonelaes d’escories marcharon p’Asturies. De primeres, fueron trataes nel Llavaderu del Batán (Mieres), perteneciente a Hunosa. Depues del so históricu usu pa llavar carbón de la mina, y ante’l zarru de les esplotaciones hulleres asturianes –l’últimu foi’l pozu Nicolasa–, en 2023 la instalación foi rebautizada como Batán Recovery, redirixiendo les sos actividaes al tratamientu y revalorización de materiales tanto de la industria siderometalúrxico como d’otros sectores. N’El Batán, les escories de biomasa procedentes de Burgos fueron llavaes pa dixebrar el xil de les sustances desechables y, asina, depurar la so calidá como materia prima fabril.
El siguiente pasu tuvo llugar n’Uviéu, onde una empresa especializada realizó los llabores d’ensugáu y molienda de les borrafes.
El procesu remató na factoría de Vidrala en Llodio (Álava), onde les tonelaes de cenices yá trataes fueron emplegaes na fabricación de 18,3 millones de botelles, la mayoría pa vinu y de tamañu estándar.
La reutilización de les escories «permitió amenorgar significativamente l’usu d’arena de xil y sustituyir parte del carbonatu de sodiu, lo qu’optimiza’l procesu de producción y mengua la buelga ambiental del procesu», señalaron Acciona y Vidrala nun comunicáu.
«Al incorporar subproductos como les escories de biomasa nel nuesu procesu productivu, nun ye que namás mengüemos l’usu de materies primes virxes, sinón que tamién menguamos la nuesa buelga ambiental, impulsando un modelu de producción más eficiente y alliniáu cola economía circular», afirmó Galo Álvarez, director de Sostenibilidá de Vidrala.
«Cola ayuda del Gobiernu del Principáu d’Asturies»
Puedes consultar la fuente de este artículo aquí