Asturies fue quien a producir en 2024 más lletricidá de la que consumió
Asturies fue quien a cerrar 2024 produciendo más lletricidá de la que consumió, un fenómenu relevante teniendo en cuenta que’l progresivu zarru de les centrales térmiques de carbón y el lentu esplegue de les anovables menguó la capacidá enerxética de la comunidá, de cuenta qu’en dellos meses de los últimos años tuvo qu’importala de fuera, dalgo que rescampla nuna comunidá históricamente xeneradora d’enerxía.
Pero nel añu completu acabante terminar ganó la partida la producción –magar que de forma axustada–, con un total de 8.076 xigavatios por hora (Gw/h), frente a los 7.885 Gw/h de consumu. Asina lo señalen los datos publicaos va unos díes pola Sociedá Asturiana d’Estudios Económicos ya Industriales (Sadei).
La mayor parte de la lletricidá, como pasa davezu, aportó de la enerxía térmica, que, a pesar del so esmantelamientu pasín a pasu, apurrió 5.108 Gw/h. Si se mira la evolución d’esta fonte a lo llargo del añu, percíbese un repique nos últimos meses, coincidiendo col repique de demanda d’enerxía pol fríu y l’encarecimientu del gas.
Sicasí, si se cumplen los plazos contemplaos, nesti 2025 l’aportación de les térmiques puede menguar radical, cuidao que se cuenta con cerrar la central d’EDP de Soto Ribera. Pela so parte, en marzu van empezar les obres de conversión a gas del grupu 2 de la térmica de la compañía n’Aboño. A nivel nacional, el cada vez más menguáu «buecu térmicu» que dexen les enerxíes verdes y la nuclear escuerren tres d’él el gas y el carbón, con ventaya pal primeru al tar menos llastráu poles cares emisiones de CO2. Sicasí, la xeneración de los ciclos combinaos incrementáronse d’un xeitu estraordinariu a lo llargo de les últimes selmanes pol encarecimientu de la so materia prima, el gas.
La siguiente fonte enerxética d’Asturies en 2024, y a gran distancia de la primera, foi la hidráulica, con una aportación de 1.664 Gw/h, siguida de la eólica, con 1.304. Pela parte del consumu, la mayor parte de los 7.885 Gw/h utilizaos recayó na industria (6.555 Gw/h del total), mentanto que pa usu domésticu gastáronse un total de 1.329 Gw/h.
«Cola ayuda del Gobiernu del Principáu d’Asturies»
Puedes consultar la fuente de este artículo aquí