Asturies, única comunidá onde nun va haber escasez de vivienda nueva
En plenu alderique nacional sobre’l desaxuste ente ufierta y demanda del mercáu inmobiliariu, Asturies rescampla como la única comunidá autónoma que, nel llustru que toma ente 2021 y 2026, llegaría construyir cuandu menos tantes viviendes como llares se tengan creao nel mesmu períodu. Asina lo señala l’últimu informe macroeconómicu de BBVA Research sobre la comunidá, presentáu esta selmana n’Uviéu.
En concretu, el serviciu d’estudios del bancu cuenta con qu’ente 2021 y 2026 van crease 11.200 llares n’Asturies, tomando «llar» según la definición del Institutu Nacional d’Estadística (INE): «Persona o conxuntu de persones qu’ocupen de mancomún una vivienda familiar principal». Nesi mesmu llustru, según los datos de visaos d’obra nueva y les previsiones que remana BBVA Research, «podríen terminase alredor de 11.500 viviendes» nel Principáu.
Esto ye, la edificación d’inmuebles n’Asturies nel periodu analizáu ye mayor que’l 100% de los llares constituyíos. Nesti sentíu, Asturies ye una esceición dafechu, una y bones nenguna de les otres comunidaes autónomes algama nin siquier el 80%. La siguiente que más s’avera ye’l País Vascu, que raspia esi porcentaxe, y de siguío figura Navarra, yá per debaxo del 60%. Madrid supera por poco’l 40% y Cataluña anda cerca del 25%. La comunidá con una menor proporción de viviendes sobre llares ye Murcia, qu’apenes degola’l 20%.
El diagnósticu pal conxuntu del país, poro, nun ye positivu. «N’España, espérase qu’ente 2021 y 2026 se creen 1,67 millones de llares, pero van terminase alredor de 650.000 viviendes», esplica a esti diariu Pep Ruiz, economista principal de BBVA Research y ún de los autores del estudiu.
Pero la situación asturiana ye distinta. «Les previsiones d’Asturies fálennos d’un equilibriu ente la ufierta y la demanda de vivienda, siquier nel casu de primeres residencies. Son les otres comunidaes les que presenten una falta», apunta Ruiz.
Esi factor de la primer residencia ye clave, porque a ello «habría que suma-y los nuevos demandantes de segunda residencia», indica l’economista. Como señala l’informe, Asturies ye la comunidá onde más creció la venta de vivienda secundaria nos trés primeros trimestres de 2024 (un 39%, frente al 5,1% de media nacional). Nel Principáu, el pesu d’esti segmentu de demanda pasó del 14,7% que tenía en 2019, primero de la pandemia de covid, al 22,4% de media hasta setiembre de 2024, últimu mes disponible.
«Trés trimestres nun faen enclín, polo que nun se puede afirmar que la demanda de vivienda secundaria n’Asturies va siguir igual de dinámica en 2025 y 2026, y nun tenemos previsiones d’ello», apunta Ruiz con precuru, anque amesta: «Pero si la evolución ye más positiva que n’años anteriores, pue ser un factor más de presión de la demanda». Ún de los motivos del crecimientu de l’alquisición de segundes residencies n’Asturies ye’l creciente pesu de compradores estranxeros.
«Cola ayuda del Gobiernu del Principáu d’Asturies»
Puedes consultar la fuente de este artículo aquí