Desembarcu asturianu na gran Selmana del Arte
Arco, la Feria Internacional d’Arte Contemporáneo de Madrid, va celebrar la so 44.ª edición del 5 al 9 marzu cola participación de les 178 galeríes de tou’l mundu nel so programa xeneral, ente elles l’asturiana ATM, que va aportar con obres del artista chilenu Pablo Linsambarth, del uvieín Pablo de Lillo y de la fotógrafa vasca Ixone Sádaba.
En 2020, depués de cinco años ensin representación de galeristes asturianos n’Arco, ATM, con sede en Deva, en Xixón, incorporóse a la gran feria internacional y dende entós ye la única representante asturiana.
Más arrogante va ser la presencia asturiana nes feries que, alredor d’Arco, coinciden en Madrid a lo llargo de la primer selmana de marzu, a partir del día 4. Esi día inaugúrase Art Madrid y el 6 de marzu Hybrid Art Fair y Urbanity Art Fair. A la primera va viaxar, dende Asturies, la xixonesa Aurora Vigil-Escalera, con obres del uvieín Iván Quesada, el xaponés afincáu n’asturies dende fai más de 20 años Tadanori Yamaguchi y un bon piñu d’artistes nacionales, ente ellos Ernesto Knorr, Francisco Mayor Maestre y Mico Rabuñal; tamién va participar n’Art Madrid la uvieína Arancha Osoro, con un plantel de ceadores asturianos ente los que tán Joaquín Viña, Iyán Castaño, Iván Baizán y Nuria Formentí.
A Hybrid va asistir Lucía Dueñas, agora con galería en formatu online, que va aportar con obres del fotógrafu belga Rafa Fernández, la uvieína Ruth Álvarez, les cerámiques de la llavianesa Natalia Suárez na so firma «Woodic» y les que realiza xunto a la salmantina Inés Iglesias, dambes axuntaes nel proyeutu «Sábadu». La galería xixonesa Zooh Microgallery va llevar a Hybrid a los asturianos Blanca Prendes y Pablo I Prada y al tipógrafu, pintor y grabador inglés Henry Iles.
N’Urbanity va tar Espacio Líquido, de Xixón, que, como n’ediciones anteriores, va de la mano de «La Gran», una galería de Carabanchel. Xuntos presenten obres d’artistes nacionales como Rosalía Banet, Pau Aguiló, Luis Pérez Calvo y Cristina Ramírez y del estadounidense Andrew Leventis; tamién Llamazares Galería, de Xixón igualmente, con Hugo Alonso, l’avilesina Alba Matilla –ganadora de l’Amuesa d’Artes Plástiques d’Asturies 2025–, Juan Francisco Casas, Menchu Lamas y Fernando Barrios Benavides.
«Cola ayuda del Gobiernu del Principáu d’Asturies»
Puedes consultar la fuente de este artículo aquí