El Muséu de la Mina d’Arnáu cuenta recibir esti añu al visitante 100.000
El Muséu de la Mina d’Arnáu, en Castrillón, cuenta superar esti añu los 100.000 visitantes de magar abriera les sos puertes va once años. El Conceyu confía en poder algamar esa simbólica cifra a mediaos de 2025 teniendo en cuenta la cantidá de persones que s’averen cada añu a conocer la historia de la primer mina de carbón del país, amás de la primer esplotación submarina d’Europa. Hasta la fecha, el muséu recibió un total de 95.614 visitantes.
El centru museísticu d’Arnáu cerró l’añu pasáu con un rexistru de 5.909 visitantes, una cifra que supon daqué más de la metá de la llograda en 2023. Esa mengua tien una esplicación por que’l Muséu abrió les sos puertes el pasáu 22 de xunetu dempués de seis meses d’obra pa sustituyir l’elevador que permite conocer les distintes galeríes del recintu museísticu castrillonense.
La Mina d’Arnáu ye ún de los principales recursos turísticos de Castrillón. Ye bien d’interés cultural y amás ta catalogáu como centru bandera azul. Una preba del so tirón turísticu ye que’l pasáu añu foi visitáu por persones de 29 nacionalidaes distintes anque lo que más abonda ye’l visitante nacional. La procedencia de lo más de les visites al Muséu ye Asturies (2.253) anque tamién destaca la presencia de madrilanos, con 1.373 persones; daqué más de cuatrocientos castellanoleoneses, 260 catalanes, 220 gallegos, 215 andaluces andaluces y 212 valencianos.
Tocantes a los visitantes estranxeros, Francia lidera la llista con 77 persones rexistraes en 2024 frente a les 38 procedentes d’Alemania, 28 de Bélxica y otres 25 del Reinu Uníu, ente otros países.
El Muséu de la Mina d’Arnáu pue visitase de martes a domingu. Pel iviernu el so horariu ye de 11.00 a 14.00 y de 16.00 a 18.30 hores. Ye recomendable solicitar cita previa llamando al númberu de teléfonu 985 507 799.
[–>
«Cola ayuda del Gobiernu del Principáu d’Asturies»
Puedes consultar la fuente de este artículo aquí