Berto García ye un poeta corveranu mui prolíficu. Tovía más, si va poco más d’un mes publicaba la so primer antoloxía de versos, «Xera» (editorial Cuatro Gotes) depués de 20 años de trayeutoria, agora asoleyó una segunda. La nueva titúlase «Entropía», que «en física ye lo que mide la cantidá d’orde y desorde qu’hai nun sistema», y tien la peculiaridá de que ye la primer vegada en dos décades que los poemes del autor de Les Vegues pueden lleese en castellán. Porque ye una edición billingüe. El restu de la so amplia bibliografía siempre tuvo escrita n’asturianu. «Entropía, qu’edita Trea, tien los versos orixinales n’asturianu y tamién en castellán, asina podemos averanos a más llectores», destaca’l corveranu, que detalla que la so otra antoloxía, «Xera» ye «complementaria» a «Entropía». Según esplica García, la intención yera qu’esta antoloxía s’asoleyara enantes de la pandemia, sicasí, por delles circunstancies, foi publicada agora.