esti ye’l negru datu demográficu d’Asturies
Anque les nacencies xubieron como poques vegaes n’Asturies, el númberu de fallecimientos sigue siendo esfarrapante. En concretu y según datos publicaos esti día pol Institutu Nacional d’Estadística (INE), l’añu pasáu nel Principáu rexistráronse 4.550 partos frente a les 13.137 muertes. Eso da nun saldu vexetativu negativu de 8.587 persones, el tamañu d’habitantes del conceyu de Navia.
La situación de la natalidá nel Principáu contrasta cola de la vecina Cantabria, que tuvo un incrementu del 13,3% en nacencies. Ello ye que ye la comunidá na que más xubieron los bebés xunto a la de les Isles Baleares (5,7%). Pela contra, los mayores descensos tán en Galicia (-4,4%) y País Vascu (-3,7%). N’avientu, n’Asturies, vinieron al mundu 362 neños, frente a los 417 del mesmu mes del añu anterior. 2024 ganó a 2023, pero pola mínima: por namás 5 nácaros.
Al respeutive de los fallecimientos, los mayores aumentos produciéronse en Cantabria (6,1%) y Castiella y Lleón y Estremadura (5,0% en dambes). El mayor descensu rexistróse na ciudá autónoma de Melilla (-14,0%). El crecimientu vexetativu (esto ye, nacencies menos fallecimientos) foi negativu en toles comunidaes, quitando na Comunidá de Madrid (que tuvo un saldu positivu de 2.707 persones), Murcia (852), Isles Baleares (237) y les ciudaes autónomes de Melilla (370) y Ceuta (142). Otra manera, los saldos vexetativos más negativos rexistráronse en Galicia (-19.333), Castiella y Lleón (-16.385) y Cataluña (-13.668).
Según l’INE, a lo llargo de 2024 hubo un total de 322.034 nacencies n’España, lo que supunxo un aumentu del 0,4% respeutu l’añu anterior (1.378 más). Pela so parte, los finaos xubieron a 439.146 persones, un 0,7% más que nel añu anterior. Por edá y sexu, el mayor descensu nos fallecimientos en términos relativos viose nes persones ente cinco y 29 años n’homes (-6,1% al respeutive de 2023), y nes de 85 a 89 años en muyeres (-6,0%).
«Cola ayuda del Gobiernu del Principáu d’Asturies»
Puedes consultar la fuente de este artículo aquí