Fai falta talentu mozu y especializáu: razón Asturies
A la de buscar talentu n’Asturies, les empreses del Principáu detecten unánimemente un problema: la escasez de profesionales especializaos. Asina lo afirma’l 92% de les compañíes consultaes pal últimu barómetru sobre les necesidaes de talentu nel Principáu qu’ellaboró la organización Compromisu Asturies XXI, y que se presentó va unos díes n’Uviéu.
Les respuestes llograes na encuesta lleven a la conclusión de que les empreses asturianes acusen una falta de profesionales pa perfiles específicos. Por dos motivos: nel casu de los puestos más téunicos, que suelen esixir una mayor cualificación, la intensa competencia ente compañíes conviértenlos nun bien escasu. Y al respeutive de los oficios que surden de la Formación Profesional (FP), la causa ye falta d’orientación nes escueles y families, según apunta l’informe. D’un xeitu más xeneral, «esiste una falta de talentu mozu», señaló José Canseco, collaborador de Compromisu Asturies XXI y coordinador del barómetru.
Los sectores y actividaes a los que-yos fai falta más talentu, según l’analís, son el teunolóxicu, la industria pesao («un motor económicu n’Asturies qu’enfrenta grandes dificultaes», tovía más de magar l’anunciu d’ArcelorMittal de la paralización del so gran proyeutu de descarbonización) y, de manera xenérica, los oficios tradicionales. «Fai falta atraer talentu estranxeru, especialmente de Suramérica, por cuenta de la falta de vocaciones locales nestos puestos», indica’l documentu. Nesti contestu los sectores de la construcción y la hostelería d’Asturies tán especialmente interesaos en fomentar la contratación nos países d’orixe, que’l Gobiernu central facilitó depués de la última reforma de la llei d’extranxería.
Dientro de les compañíes, los puestos que más cuesta cubrir son dellos. Los más remarcaos son: comercial, abogáu sénior, téunicos/operarios, conductor, inxenierios –metalúrxicos, informáticos, de telecomunicaciones…– y téunicos superiores en prevención de riesgos llaborales, ente otros.
El 52% de les empreses demanda perfiles universitarios, el 36%, graduaos en FP; y el 12%, estudios de máster y/o doctoráu. Coles mesmes, el 48% busca trabayadores con cuatro o cinco años d’esperiencia, el 32%, de dos o trés años; y el 12%, ensin esperiencia. Un nivel altu d’inglés ye obligatoriu en munches empreses, siendo un criteriu clave de selección.
Movimientos demográficos
Depués la escasez de mano d’obra especializao, el principal desafíu señaláu poles empreses son los movimientos demográficos y xeneracionales de la población asturiana, sobremanera dempués de la pandemia. «Vemos que ye más fácil retornar en ciertes edaes: tanto los menores de 30 como los mayores de 50 tienen más facilidá pa la torna o la movilidá; sicasí, los que tán nel estragal de 30 a 50 tienen más barreres pa facelo», indica l’informe.
[–>
«Cola ayuda del Gobiernu del Principáu d’Asturies»
Puedes consultar la fuente de este artículo aquí