llista d’esperar pa esponer y 300 visites, de media, al día
La Casa de las Tres Culturas de Cuideiru abrió les sos puertes el febreru pasáu y, nueve meses dempués, ye un centru cultural afitáu del que tán arguyosos el gobiernu y los amantes de la cultura. De ser un edificiu en ruines pasó a presentase como un espaciu cobiciáu polos artistes locales y foriatos.
Pa esponer, hai llista d’espera y de magar el branu les esposiciones fueron a más: desenvolviéronse casi una ventena d’actividaes nes que participaron otros tantos creadores. Na actualidá (y hasta’l nueve d’avientu) preséntense trabayos d’Elena Pérez, Ana Tuñón, María Jesús Cachero, Pepe Cándano, Manolo Romero, Giovanna Romero y Margot Velura. Son toos ellos artistes que de forma individual amosaron los sos trabayos nesti espaciu pixuetu.
La planta baxa del edificiu ye un espaciu diáfanu, «ideal», según los especialistes, pa facer los discursos de les muestres artístiques. Cuéntase con que pela Casa de las Tres Culturas pasen unes 300 persones al día nes xornaes de mayor xentíu. Un ésitu. «L’oxetivu yera, per un llau, remocicar una ruina que yera yá un peligru pal viandante y, pel otru, aumentar el patrimoniu del Conceyu y ufiertar más actividaes culturales», apunta l’alcalde, Carlos Valle. Primero, diose prioridá a los artistes locales. Más tarde, nun tardaron en llegar les llamaes d’otros creadores de conceyos cercanos.
Ello ye que la novedosa sala funciona como un imán y a lo llargo de los meses colgó’l cartel de completu: nun había feches disponibles pa enseñar el trabayu de tolos artistes que s’interesaben pola Casa de las Tres Culturas. «El nuesu deséu ye que tenga cada vez más conteníu y que la xente nun vea siempre lo mesmo», afonda l’alcalde. L’actual esposición axunta a seis artistes qu’espunxeren n’anteriores ocasiones y que tán «satisfechos» col resultáu. Delles obres pueden mercase y otres pertenecen a la coleición privada de los creadores.
El gobiernu ta, amás, comprometíu colos artistes del conceyu. Depués de la inauguración del espaciu dio prioridá a los creadores de Cuideiru o con llazos nel conceyu. «Ye importante dar visibilidá a lo qu’hai y se fai nel conceyu», conclúi’l rexidor.
La sala va permanecer abierta tola ponte de la Constitución n’horariu comercial.
[–>
«Cola ayuda del Gobiernu del Principáu d’Asturies»
Puedes consultar la fuente de este artículo aquí