Ún de cada cinco nacíos n’Asturies, cola natalidá en mínimos, ye de madre estranxera
La natalidá n’Asturies cayó embaxo en 2023, col mínimu de nacencies de los postreros 50 años, nun periodu nel que tamién se rexistró nel conxuntu d’España’l peor datu de númberu de fíos por muyer dende 1998. L’Institutu Nacional d’Estadística publicó los datos demográficos correspondientes al añu pasáu, que cifren en 4.545 el númberu de nacíos nel Principáu, un datu qu’entamó un enclín descendente dende 1978 sacantes un periódu de leve repique a principios d’esti sieglu. Asturies sigue a lo cabero d’España en tasa de natalidá (nacíos por cada mil habitantes) y caltien un índiz de fecundidá (númberu de fíos por muyer) menor d’ún, una situación que se produz dende 2019.
Estos datos, que certifiquen una baxa natalidá d’Asturies cuasi endémica, enmárquense nun escenariu negativu nel conxuntu d’España: l’índiz de fecundidá del país baxa a 1,12, un mínimu históricu. Cinco comunidaes autónomes tienes menos d’un fíu por muyer (Canaries, Asturies, Cantabria, Galicia y Baleares), nun llistáu qu’encabeza Murcia con un escasu índiz de 1,27. Pero si se repara por menudo nos datos conséñase qu’esi enclín descendente allivia poles xestaciones de madres nacíes nel estranxeru. N’Asturies, muyeres d’orixe estranxeru proporcionen ún de cada cinco nacíos en 2023. Nel conxuntu d’España, esa relación medra hasta’l 31,2%, lo que supon que cuasi ún de cada trés allumamientos n’España fueron de madres nacíes fuera del país.
Nel Principáu rexistráronse en 2023 un total de 13.012 fallecimientos, de mou y manera que’l saldu vexetativu de la comunidá (nacíos menos finaos) sigue en númberos coloraos y asitia en -8.467 persones que, con tou, nun ye’l peor datu de los últimos años yá que en 2020 raspióse la perda de 10.000 habitantes na diferencia vexetativa. Con too y con ello, Asturies llogró dir axorizando la pantasma de la perda del millón d’habitantes gracies a los datos positivos nel saldu migratoriu.
[–>
Horizonte octoxenariu
El datu más positivu de la estadística ye’l fechu de que la esperanza de vida superara por fin el bache que supunxo la pandemia de Covid, que rebaxó en 1,25 años la mira de llonxevidá de los españoles. Agora, pa los asturianos esa cifra púnxose en 83,77 años. En 2019 el datu andaba en 83,53 años.
[–>
«Cola ayuda del Gobiernu del Principáu d’Asturies»
Puedes consultar la fuente de este artículo aquí