Ún de cada trés xueces d’Asturies va xubilase na próxima década
Ún de cada trés xueces n’Asturies va xubilase nel próximu deceniu. Ello ye que 42 de los 155 maxistraos asturianos van llegar a los 70 años (anque pueden allargar la so actividá hasta los 72) enantes de 2035. Pero a éstos hai qu’axuntar les baxes voluntaries, que son tamién permunches. Un informe de l’Asociación Xudicial «Francisco de Vitoria» (AJFV) señala que les baxes voluntaries fueron un 42 por cientu de les xubilaciones nel conxuntu del país. Toos estos datos avisen de la necesidá d’aumentar los ingresos na carrera xudicial.
L’últimu añu rexistráronse n’España 109 xubilaciones, de les que 46 fueron antemanaes. «Esti eleváu porcentaxe ta íntimamente conectáu cola elevada carga de trabayu, el constante aumentu de la litixosidá y l’afitamientu d’un procesu de deslexitimación del poder xudicial por parte d’otros poderes del Estáu», esplica Sergio Oliva, autor d’un estudiu sobre les xubilaciones na carrera xudicial y vocera de l’Asociación Xudicial «Francisco de Vitoria». Cada cuatro díes xubílase un xuez n’España, y «nun se tán convocando les places necesaries pa cubrir les xubilaciones, de manera tala que’l serviciu al ciudadanu ta deteriorándose cada añu», rescampla AJFV.
N’Asturies, según un informe del CGPJ correspondiente a 2024, hai 38 maxistraos d’ente 61 y 70, 17 d’ellos muyeres y 21 homes (ye l’últimu segmentu d’edá nel qu’hai una mayoría de xueces homes sobre les xueces). Amás, hai 4 maxistraos de más de 70 años, que se van xubilar d’equí a poco.
El maxistráu Sergio Oliva destaca que, según l’analís del escalafón de la Carrera Xudicial, cuéntase con un aumentu sosteníu nel númberu de xubilaciones nos próximos años. Esti fenómenu podría xenerar un «grave perxuiciu al serviciu públicu de l’alministración de Xusticia, por cuenta de la incapacidá de l’actual plantía de xueces pa resolver los conflictos de la ciudadanía dientro d’un plazu razonable». Si a les xubilaciones forzoses s’axunta una proyeición de les voluntaries, resulta qu’a lo llargo de los próximos 8 años van xubilase aprosimao 1.756 xueces. Si la carrera xudicial nel añu 2024 taba compuesta por 5.416 xueces, saldría’l 32,42 por cientu.
La situación agrávase por cuenta de que’l Gobiernu nun ta convocando places abondo pa cubrir les baxes por xubilación forzosa, y la tasa de litixosidá nun dexa de crecer, asitiándose en 157 asuntos por cada 1.000 habitantes, 12 puntos más que nel 2023. El voceru de la AJFV recuerda qu’el CGPJ yá alvirtió de que fai falta incorporar cerca de 6.500 nuevos xueces a la carrera nel deceniu 2023 a 2032, lo qu’implica que se tendríen d’ufiertar ente 310 y 350 places al añu.
«Cola ayuda del Gobiernu del Principáu d’Asturies»
Puedes consultar la fuente de este artículo aquí