Uviéu triplica nuna década la venta de pisos y arímase a los datos de 2007
La venta de viviendes va como un volador na capital asturiana. Les inmobiliaries rexistraron 2.834 transacciones a lo llargo de los trés primeros trimestres de 2024 triplicando los datos llograos nel mesmu periodu de 2014 cuando se contabilizaron 914 operaciones y arimándose a les cifres de 2007 con 3.162 actuaciones. Asina apaez espeyao nes estadístiques publicaes pol Ministeriu de Tresportes y Movilidá Sostenible, lideráu por Óscar Puente, onde se conseñen los datos de les dos últimes décades y nes que s’establez un récord añal de 5.590 d’execuciones en 2006.
Daquella, España taba somorguiada na burbuya inmobiliaria, pero los bonos momentos económicos dieron la vuelta en 2008 col entamu de la crisis económica ya impunxéronse mayores torgues a la d’aportar a una hipoteca. Sicasí, na capital asturiana les bones cifres de ventes caltuviéronse dos años más, hasta qu’hubo un esmarrumbu dafechu. Les ventes pasaron de 3.011 en 2010 a 1.746 en 2011. Les baxaes siguieron a lo llargo d’otros venticuatro meses hasta qu’en 2013 marcaron mínimu con 1.051 operaciones. Dempués, empezó una xubida d’un llustru cerrándose l’añu 2014 con 1.301 transacciones inmobiliaries; en 2015 hubo 1.357, en 2016 (1.636), en 2017 (2.144), en 2018 (2.411) y en 2019 (2.334). L’añu 2020 cerró con 2.306.
La pandemia provocó que munches persones camentaren camudar de vivienda en busca d’una que tuviera una terraza o una zona esterior por si se decretaben nuevos confinamientos. Tamién el teletrabayu provocó qu’a munchos-yos ficiera falta un cuartu extra y, de magar, l’aumentu de ventes foi considerable ensin atopar llende. En 2021, rexistráronse 3.173 operaciones y en 2022 hubo 3.094.
Esta situación provocó que la conseyería de Vivienda, en manes d’Ovidio Zapico, encargara un estudiu p’analizar si na capital asturiana esisten zones tensionaes. Esto ye, si hai barrios nos qu’esista riesgu de que la ufierta de cases seya insuficiente pa la población. Los resultaos, según los analises fechos a los portales inmobiliarios Idealista y Fotocasa al traviés del preciu por metru cuadráu ente 2019 y 2023, reflexen que’l tirón del HUCA disparó’l costu de les viviendes na so contorna, La Corredoria y Teatinos. Otra de les zones nes que más creció’l preciu ye la qu’axunta Ciudá Naranco, Vallobín y La Florida siguíu de Buenavista y La Ería; Fozaneldi, Tenderina y Ventanielles; y el centru xunto al cascu históricu.
Tipoloxía de viviendes
Estes estadístiques publicaes pol ministeriu de Puente tamién analicen el tipu de vivienda que se vendió. De les 2.834 transacciones inmobiliaries qu’hubo a lo llargo del añu pasáu, 2.558 fueron de segunda mano y 276 de nueva construcción. Pela so parte, 2.746 tán catalogaes como llibres y 88 protexíes.
Estos datos pueden comparase colos de 2023 porque hasta ochobre comercializáronse cuasi’l mesmu númberu de cases de segunda mano qu’en tol añu anterior. Daquella hubo 2.683 operaciones frente a les 490 de nueva construcción.
«Cola ayuda del Gobiernu del Principáu d’Asturies»
Puedes consultar la fuente de este artículo aquí