La Feria del Llibru d’Uviéu dexa la marca de LibrOviedo y conviértese n’Ofelia. Asina lo anunciaron va unos díes fontes de la conceyalía d’Educación, liderada por Lourdes García, quien detallaron que la nueva denominación ye un xuegu coles pallabres «Oviedo Feria de Libro» y la referencia al personaxe lliterariu de «Hamlet». La programación sigue respondiendo a la d’una feria comercial con casetes pa les llibreríes d’Uviéu y les editoriales asturianes. Esta programación tamién va estrenar allugamientu. Va abandonar l’emplazamientu del añu pasáu na cai Pelayo y va mudase al Campu San Francisco. El mediu centenar de casetes van instalase a lo llargo del Paséu del Bombé y La Granxa (biblioteca Lorenzo Rodríguez Castellano) va ser ún de los sitios d’alcuentru y de programación.